Dunnerwedder, do hod awwer än Blidz vum Bob Dillän gehörisch oigschlooge un die bärn erleuchded. De Gringo singd uff monnemerisch, als wärs des normahlschde vunn de Weld. Isses jo eigendlich ah, wonn erschedemol ä paar Sicherunge durchgeknolld sinn. Do is egal uff was sich Schwahdemahge reimdt, dumm gebabbeld is glei. Also, isch mähn, des is sehr innovaddiv, was do abgehd. Guud, musikalisch mehr so Hausmannskost, im Stil von Jutu odder ah widder Dillän, brauche ma ned drübber redde. Die Sprooch is des, woraufs ohkummd. Äh bissl Klischeh is schunn doboi, wonn de Gringo in so prollische Rolle schlüpfd un soi Gefühle nauslässd. Do kreischd er noch de Mudda, odda sagd ah mol gar nix, ausser RU DO DRIWWE. Herrvoragend ah glei am Ofang die Hymne Ah joo, des sich wie äh schäänes Deckbett weich iwwer alles Uhgemach driwwerlehgd. Doch ah bei denne annere Songs hod er uns viel uffs Maul gschaud, Mo Gugge handeld vun ähm, der nix uff die Reih bringd, bei Gibt´s Do Net simma beim SVW im Schdadion, un Alla Hopp is än schäh absurder Tageslauf. Also des Gonze macht viel Schbass und ma konn saage, er hod alles rischdisch gemachd. Jooh, noch ä kläh bissel mehr Tiefe häd ah ned geschaded, nach moim Geschmack. Die Frog is hald immer, ob beim breede Dialegd die Gedonge ah audomadisch breed werre müsse. Ich glaab eigendlisch ned, do könnd noch gfeild werre. Aber du konnschd ned alles hawwe, odda? Ahjoo. Awwer glaabscht, wonn de Dillän schun de Nobellpreis fer Lideraduhr bekumme hod, donn muss ma sahge, do geht ah noch was für de Gringo. Alla hopp, klasse, waida.
Gringo Mayer – Nimmi Normal
Folk/ Blues/ Rock aus Monnem / Ludwigshafe
(451) 12.2021
Alles Mannheim 
Kommentar verfassen